قصيدة شاب رفضت فتاة أحبها أن تتحدث اليه

تقول لا وتوكد عليها ديمه تزيد العقل بالسيف في تصريمه

تقول لا تسرز ناري بي يشردن كي التايهات افكاري

نحمل عذابي وغصتي ونداري نحمل نعدي كل يوم ظليمه

خفيت داي في جاشي قعد متواري كل يوم بي يزيد يكبر غيمه

كل يوم يقوى دايا وكي يوم تكبر محنتي وشقايا

وكل يوم تصرم خيوط سدايا وكل يوم يقوى سامري وجحيمه

تقول لا نوحي نار وسط حشايا قوت لا تردف للعقل تخميمه

قوت لا تتضبعني ردف محاين خاطري توجعني

فراع العقل والقلب تيضيعني عقلي رضخ ورام للتسليمه

والقلب زاد عناد ما طاوعني زاد محنتي دار العقل غريمه

عقلي رضخ وولى نهي القلب علترك المحبه دلّه

والقلب زاد عناد ما يتخلى ممروج ملكه الحب مكبر ضيمه

كمل ردفني فوق طيني بله حفظته سهر الليل بالتلزيمه

كان السهر حفظني هباني كواني بالهوى قضقضني

كثر اهساسي هسني مرضني لا يفيدني مدب ولا تعزيمه

هوى ولفتي جور علي قبضني وكل طب جي من غيرها بلا قيمه

كل طب ما فايدني على الحال لا يهون ولا يفرهدني

كل يوم داها بالدرك زايدني زي العواصف تنبدي بنسيمه

تكوفخت والتخمام متقلدني مع الليل يبدا العقل في التنجيمه

مع الليل تقوى محوني تعصف اماجع خاطري وشجوني

تهنى الخلايق يرقدوا يخلوني ماحود نشكي والونيس نجيمه

بلا غير راده من القهر عيوني بدموع مثل السيل يبكن ديمه

بلا غير راده مني تسكب دموعي والقهر ماكني

اللي زادني كمل علي ذبلني يجي طيفها في الصحو والتسهيمه

ولا حاسه بسهم الهوى قاتلني ولا قدرت نشجع نقول كليمه

لا حاسه باحساسي ولا قدرت نشكي بمحنتي وهلواسي

خفيت داي درته مع قديم اهساسي محمم قديم وزادني تحميمه

مجروح في نار المحبه قاسي ضر لجالي يكيد كل عزيمه

لجالي ضرر هواها كبدي معسها لظها وكواها

لا قدرت نجبر خاطري ينساها نزهد غلاها نتركه ونصيمه

ولا قدرت نهنى بالمحبه معاها نسعد ونهنى بحبها ونعيمه